Lotería de nadal 2015

Xa está á venda a lotería do nadal da CIG deste ano.
Cada rifa custa dous euros, un polo número 92.231 e outro polo número 74.723, e podes pedirlla a calquera membro da CIG ata o venres 4 de decembro.

Valoracións da CIG sobre a negociación do ERE e a folga

O luns 28 de setembro, a empresa presentou na mesa negociadora unha proposta que definiu como definitiva pola súa parte e que mantén o número de despedimentos por riba dos mil para o conxunto de Vodafone e Ono.
De maneira resumida, consiste no seguinte:

• 1.059 despedimentos entre Vodafone e Ono.
• Indemnización de 45/33 días de salario por ano traballado, co tope establecido no artigo 56 do Estatuto do Traballador: 24 mensualidades.
• Acéptanse adscricións voluntarias, pero a empresa resérvase a posibilidade de veto.
• Prexubilación para persoas afectadas polo ERE que teñan 55 anos ou máis a 30/06/2016.
• Plan de recolocación externa.

Adicionalmente, proponse o seguinte para as persoas que permanezan na empresa:

• Garantía de non acometer despedimentos colectivos ou externalizacións ata o 31/12/2016.
• Ampliación parcial do seguro de saúde a cónxuxes e fillos/as de empregados/as.
• Aumento do importe anual dos tickets restaurante ata os 1.500 €.
• Eliminación da axuda para empregados/as con fillos/as menores de 4 anos, mantendo as que estean en curso.
• Eliminación da redución do 15% do STIP e do 6% dos incentivos que se aplicara no ERE de 2013.
• Incremento salarial do 2%, automático en xullo de 2016, e ligado a determinados condicionantes a partir dese ano.
• Incremento do período de xornada intensiva, que pasa de mes e medio a dous meses.

 

UGT e STC fixeron unha valoración positiva desta oferta, mentres que CCOO e a CIG opinamos o contrario.

Na CIG non podemos alegrarnos do resultado desta negociación, na que se dedicou máis tempo a falar das posibles indemnizacións e das melloras das condicións das persoas que continúen na empresa, que de reducir os despedimentos.

Despois de que no ERE de 2013 se despedisen ou externalizasen máis de 700 persoas, non podemos aceptar que en Vodafone se despidan  ata 437 máis este ano.

Para nós, isto é do que se debía falar na negociación, e para o que se debían buscar medidas alternativas.

Os cálculos cos que a empresa intentou xustificar este volume de despedimentos foron cuestionados por todos os sindicatos, pero non se chegaron a refacer en ningún momento. A consultora que preparou o informe técnico da empresa partiu de premisas erróneas sobre o volume de actividade prevista, para chegar ao número de despedimentos que a empresa pretendía.

Asimesmo, as rebaixas por parte da empresa, 55 afectados/as menos en Vodafone (reunión do 22 de setembro) e 100 menos no conxunto de Vodafone e Ono (reunión do 28), son tímidas, e non responden a unha redefinición dos cálculos do informe técnico.

Nesta situación, eran necesarias medidas de presión proporcionais ao impacto que ía ter o ERE sobre o emprego. No entanto, o que se fixo foi convocar unha folga tarde, e de forma prácticamente testemuñal.

Convocar unha folga cando xa se están regateando as condicións das indemnizacións, non anima a que a xente a secunde para reducir despedimentos. E a decisión de UGT e STC de introducir na negociación as condicións das persoas que se quedan, para o que serve é para que as que consideran que teñen opcións de continuar na empresa non se mobilicen para defender os postos de traballo.

En vez de fomentar a solidariedade entre os/as traballadores/as, o que se fixo foi pór en bandexa á empresa o despedimento colectivo que pretendía levar a cabo.

Como punto positivo, destacamos o comportamento do persoal de Vigo, que coa súa masiva participación na folga e manifestación do luns 28, deu un exemplo do que significa a defensa do emprego. Esa é a actitude que se necesitaba, pero non se deu en todas as sedes da empresa. Concretamente, en Madrid, como sede na que traballa a maioría do persoal, terá que darse unha profunda reflexión sobre o acontecido, se queremos ter alguna esperanza de que en pouco tempo non volvamos a sufrir o deste ERE.

 

Preacordo e desconvocatoria de folga

Na reunión de hoxe da mesa negociadora do ERE, a empresa presentou o que definiu como a súa proposta final, que UGT e STC valoraron positivamente. Estes dous sindicatos suspenderon a folga durante o martes 29.
CCOO comunicou tamén a desconvocatoria para ese día por motivos diferentes.
Así pois, ningún dos tres sindicatos convocantes mantén a folga do martes.

Ese día o que haberá é asembleas en todas as sedes (en Vigo será ao mediodía, a unha hora por concretar), nas que se presentará o preacordo para que o cadro de persoal o valore.

Novidades folga: non abrir sesións en remoto

Traballar dende a casa é traballar, é dicir, significa non facer folga.
Se te conectas en remoto (se abres sesión), a empresa podería computarte dentro da cifra dos que non secundan a folga, minimizando así o impacto desta medida de presión.
Lembra: non abras sesión no teu ordenador ningún dos días da folga.

Folga e axenda de actos contra o ERE

Os días 28, 29, e 30 de setembro está convocada una folga en toda a empresa, á que a CIG se suma co obxectivo de parar este ERE.

O luns 28, en Vigo terá lugar unha manifestación que sairá da tenda da Gran Vía. Ás 11:30 reunirémonos diante da tenda para saír ás 12:00 por Urzaiz ata o MARCO, onde nos concentraremos.

Ese mesmo día pola mañá, no Pleno do Concello de Vigo vaise tratar a posibilidade de que saia unha declaración institucional apoiando as nosas reivindicacións.
Cando se saiba a hora, comunicarase.

O martes 29, segundo día de folga, está convocada unha concentración ás 10:00 en Compostela diante do Parlamento de Galicia (Rúa do Hórreo, 63).

O martes tamén se celebrarían asembleas en todas as sedes (fóra das oficinas, pois durante a folga non se poden facer dentro) para informar sobre o estado das negociacións, que rematan o día seguinte. Informarase da hora cando se concrete.

Permanece atento ás novidades que poidan xurdir durante eses días.
Non te cruces de brazos mentres deciden o teu futuro. Participa!

Non ao ERE en Vodafone

O 1 de setembro Vodafone convocou aos sindicatos para negociar un ERE co que intenta despedir a 492 persoas en Vodafone (un 13,1% do persoal) e 805 en Ono. En Vigo, a afectación é superior á media.

A empresa pretende xustificar o despedimento colectivo con causas económicas, produtivas, e organizativas, estas últimas como consecuencia da compra de Ono.

Os continuos recortes en gastos de persoal (conxelación salarial, ERE temporal en 2012, ERE extintivo no 2013) parecen non ser nunca suficientes para unha empresa que non quere entender que é esa xente da que se quere desfacer sen miramentos a que saca o traballo adiante para podermos ser competitivos.
Non sobra xente, sobran decisións equivocadas, e este ERE é a peor delas.

Non te resignes nin penses que isto non vai contigo. Vai contigo e cos demais.
Participa nas protestas convocadas.